बोङबस्तीसंलग्न जंगलमा मानव कंकाल

21 सेप्टेम्बर(कालेबुङ):- कालेबुङ थानाअन्तर्गत लोअर बोङबस्तीसंलग्न जंगलबाट संदिग्ध अवस्थामा मानव कंकाल भेटिएको घटनाले क्षेत्रमा सनसनी फैलिएको छ। घटनाबारे सूचना पाएपछि बिहीबार साँझ कालेबुङ पुलिसले घटनास्थलबाट उक्त नरकंकाल उद्धार गरेको छ। कालेबुङ थानाबाट लगभग तेह्र किलोमिटर टाडा बोङबस्तीको गैरीगाँउ संलग्न जंगलमा स्थानीय एक किशोरले उक्त मानवकंकाल देखेका थिए। गाई बाख्रा चराउन सो जंगलमा पुगेका उक्त किशोरले त्यहाँ मानव कंकाल देखेपछि गाउँलेहरुलाई सूचित गरे। गाउँलेहरुले घटनाबारे कालेबुङ पुलिसलाई सूचना दिएपछि पुलिसको दल घटनास्थलमा पुगेर नरकंकाल उद्धार गरेको हो।

पुलिसले घटनास्थलबाट झण्डै चार किलो ओजन भएको डोरी, जिन्स पेण्ट, हाईनेक र एउटा पेन पनि उद्धार गरेको छ। घटनास्थलबाट प्राप्त यी सामग्रीहरुको आधारमा यो कंकाल 25देखि 30 बर्षको युवकको हुन सक्ने पुलिसको अनुमान छ। यस मानव कंकालको पहिचानबारे अहिलेसम्म कुनै तथ्य र जानकारी पुलिसलाई प्राप्त भएको छैन। कालेबुङ पुलिसले कंकालको फोरेन्सिक जाँचको निम्ति सिलगढी पठाएको छ। जाँचको रिपोर्ट पाएपछि मात्र केही भन्न सकिने घटनाको जाँच गरिरहेका पुलिस अधिकारीको भनाई छ। लोअर बोङबस्तीसंलग्न गाउँहरुबाट आजसम्म कोही पनि निखोज भएको घटना प्रकाशमा नआएकोले पनि यस मानव कंकालको पहिचान खुलाउन पुलिसलाई चर्को परेको छ। घटनास्थलको आरम्भिक जाँचपछि पुलिसले यसलाई आत्माहत्याको घटना हुन सक्ने सम्भावना न्यून रहेको बताएको छ भने अन्यत्र क्षेत्रबाट यहाँ ल्याएर हत्या गरी शव फ्याँकिएको हुन सक्ने पुलिसको अनुमान छ।