मोर्चा कार्यकर्ता भीम भुजेल पक्राउ

कालेबुङ 24 जुन। निकै समयदेखि कोर्टको वारण्ट झेलिरहेका मोर्चा कार्यकर्ता भीम भुजेललाई कालेबुङ पुलिसले पक्राउ गरेको थियो। मोर्चाको आन्दोलनकालका मामिलाहरूको थुप्रै सुनवाइमा उपस्थित नहुँदा कोर्टले भुजेलविरुद्ध गैरजमानती वारण्ट जारी गरेको थियो। पुलिसले तिनलाई आज अपरान्ह यहाँको टाउनहल परिसरबाट पक्राउ गरेको थियो। पुलिसले तिनलाई आज नै कालेबुङ कोर्टमा पेश गरेको थियो। तिनीविरुद्ध गैरजमानती धाराअन्तर्गत मामिलाहरू रहेको कारण एसीजेएम कोर्टले तिनको जमानत याचिका खारेज गरी 14 दिनको न्यायिक हिरासतमा राख्ने आदेश दिएको छ। तिनी मोर्चाको 42 नम्बर समष्टि समितिका सल्लाहकारसहित कालेबुङ महकुमा समितिमा सो समष्टिका प्रतिनिधि सदस्य पनि हुन्। तिनीविरुद्ध बर्ष 2009मा पूर्व दागोपाप पार्षद छिरिङ शेर्पाको कफेरस्थित घरमा आगजनीलगायतका अन्य आपराधिक मामिलाहरूमा संलग्न रहेको आरोपमा मुद्दा चलिरहेको छ। कालेबुङ कोर्टमा चलिरहेको यी मामिलाहरूको सुनवाइमा नियमित रुपले अनुपस्थित बन्दै आएका धेरैजना मोर्चा कार्यकर्ताहरूविरुद्ध कोर्टले वारण्ट जारी गरेको छ। पुलिसको नजरबाट बाँच्दै हिँडीरहेका भुजेललाई आज पुलिसले अचानक आफ्नो नियञ्त्रणमा लिएको थियो।