नागरिक अधिकार मञ्चको स्वागत जनता सड्‌कमा ओर्लनैपर्छ- मञ्च

कालेबुङ, 19 अक्टोबर।
गोर्खा दुःख निवारक सम्मेलन अनि कालेबुङ संरक्षण समितिले संयुक्त रूपमा आयोजना गर्ने पिउने पानीको जुलूसलाई कालेबुङ नागरिक अधिकार मञ्चले पनि स्वागत जनाएको छ। मञ्चका अध्यक्ष एनपी दिक्षितले पनि पिउने पनी समाधनार्थ आयोजना गरिएको जुलूसमा कालेबुङबासी सबैले समर्थन जनाएर सहभागी हुनुपर्ने बताएका छन्‌। दार्जीलिङमा आएर जसरी मुख्यमन्त्री ममता ब्यानर्जीले बालसन जल परियाजनाको निम्ति राशि घोषणा गरे त्यसरी नै यदि उनी कालेबुङ पनि आइदिएकी भए कालेबुङको पिउने पानीको निम्ति पनि केही गरिदिन्थिन्‌ होला भन्ने मञ्चका अध्यक्ष एनपी दिक्षितले  आशा व्यक्त गरे। मुख्यमन्त्री कालेबुङ आएनन्‌ यद्यपि पिउने पानी यथाशीघ्र समाधानको मागमा मुख्यमन्त्री लगायत विधायक समेतलाई मञ्चले पत्रचार गरिसकेको तिनले जनाए। जनता जुलूसमा सहभागी बन्नु आवश्यक रहेको बताउँदै तिनले भने, जनता जबसम्म सडकमा ओर्लँदैन तबसम्म सरकारले रेटपुच्छर लाउँदैन। बिजुलीको खम्बामा बल्ब झुण्डाउनु होस्‌ अथवा बाटो  मरम्मति गर्न सरकारले आफै कहिले गर्दैन। यसैले सरकारलाई झकझकाउनै भएपनि हामी सड्‌कमा ओर्लनैपर्छ। मञ्चका सचिव पीके प्रधानले मञ्चले पिउने पानीको निम्ति अघिल्लो वर्षदेखि नै पहल गरेको भएपनि आजसम्म समाधान भने नभएको बताए। तिनले अस्थायी रूपमा होइन तर कालेबुङमा पिउने पानीको समस्याको स्थायी समाधान हुनुपर्ने बताए।